انا والطعام والكأبه

عندما  يكون الطعام هو المصدر الوحيد للبهجه .....وانتظار الطعام هو الامل الوحيد للاستمرار ...و شرب الشاى هى المكافأه الوحيده  لنهايه المهمه   ....ومائده الطعام هى المكان الوحيد لصله الرحم و زياره الاقارب   ... و ترتيب اطباق الطعام هو الوقت الوحيد للابداع ....وهضم الطعام هو الجهد الوحيد المبذول......عندما يتمحور يومك على الطعام هذا هو المعنى  الوحيد  للكأبه 

مواقف خدثت معى فى القاهره :))))

التوكتوك باااااااطل
وانا نازل من الدائرى وبتنطط لقيت سواق التوكوك بصلى فى عنيى وقالى كوبرى قلتله اه كوبرى قالى تعالى اركب من قدام !!!! الباشا طلع مركب قابلى تلاته فى التوكتوك ..انا قلت ومالوا ارضى بنصيبى هو فى حد لاقى تكاتك اليومين دول:)) ..روحت ركبت ...شويه وقالى حط دراعك ورا ضهرى !!!!انا قلت حقه عشان يعرف يسوق :)) شويه ولاقيته باصص لبره وبيقول لواحد كوبرى راح قاله اه راح قالوا اركب قدام :(( انا كان نفسى قالوا كده حرام يا أساحبى الشرع محللك اربعه بس ..ههههههههههههه :)) على فكره الكلام ده حصل معايا بجد امبارح وكانا راكبيين سته فى التوكتوك ...واوعى حد يفسر كلامى بطريقه غلط ;)

يا خساره 

امبارح كنت ماشى مع اتنين صحابى فى وسط البلد ولقيت واحد جاى على وقرب ايدوا عليا ...انا خفت يعمل معايا زى الى حصل مع سعاد حسنى فى فيلم خلى بالك من زوزو لما الراجل حطلها الجنيه فى .....انت عارفيين طبعا :)) بس الحمد لله لقيتوا بيحط كرت فى جيب القميص ..انا استغربت اشمعنى انا ..بشوف ايه المكتوب فى الكارت وكانت الصدمه :((( ...معرض

البدل للمقاسات الكبيره :((((( يا خساره سنه الرجييييم وعدم الاكل والجوع :(((

أممكن

وانا راكب البوكس ..مش بتاع البوليس ده عربيه ربع نقل متفقله زى البوكس مقدمه لخدمه المواطنين :)) المهم راجل راكب قال هم عاوزين ليه رئيس ما أحنا كده كويس هم عاوزيين رئيس يسرق البلد ويهرب ...انا عاجبنى رأيه مش عارف ليه ...يمكن من تأثير الهوا الساقع الى ضارب فى قفايا ..عشان الراجل بتاع البوكس مش مكسل يقفل البوكس كويس ...ولا الراجل عنده وجه نظر !!!!!!

الحمد لله وصلت

اليوم النهارده كان جميل ...الطريق وانا راجع كان واقف ...نزلت استنى اى عربيه رايحه الدائرى _هرم فضلت مستنى نص ساعه ..ههههه..الناس كانت بتنط جوا العربيه وهى ماشيه ..وده صعب على ..المهم لقيت مينى باص ..ولقيت الدائرى واقف تخيلوا ..واحنا فى نص الطريق الاقى واحد بيقول موبيلى اتسرق وقف يا اسطى عشان افتش الركاب ..هههههههههه...المهم كل واحد كان بينزل الراجل بيفتشوا ومره واحده سمعت صوت غريب ..العجله فرقعت ..ههههههه...قعدنا نص ساعه ...ضاع على ميعاد الكورس ..روحت لقيت فى حنه فى الشارع والحشيش (مخدر للتوضيح) فى كل مكان :)) و العروسه انا متاكد انها ضربه ترامدول وشغاله ترقص فى نص الطريق هههههههه وفلاشه النت باظت ..بس الحمد لله وصلت :))

التكوتك يشيل من الحبايب الف 

والله التوكتوك مش بيشيل اكتر من اتنين .. يااااااااااااه ..انا كده حسيت ب الراحه ..كلام نفسى اقولوا لبتاع التوكتوك بس بشييل فى نفسى واسكت وكان لازم اقوله فى اى حته عشان منفجرش :((

خافوا على فراخكم

راكب الميكروباص ورايح البيت ...لاقيت الناس كل ما تعدى جنب الميكروباص تعمل كلكس للسواق ..راح واحد فيهم بيقول للسواق العجله سااااايبه يا اسطى ..راح السواق يرد عليه اه اه ما انا عارف والسواق مكمل فى طريقه عادى خالص ...نهاااااااااااااااااااااار اسود هو فاكر نفسه محمل فراخ :((

برنامج حياتى 

انا حياتى اتحولت لبرنامج تلفزيونى ...اول فقره هى الرياضه ..وهى عباره عن تمرين لكيفه جعل جسمك فى اقل مساحه عشان صاحب التكتوك يعرف يركب تلاته من ورا ..تانى فقره وهى تعلم لغه الاشاره ..عباره عن استخدام لغه الاشاره لتوقيف الميكروباص الصحيح ..تالت فقره هى الفقره الدينيه ...عباره عن انك تشوف كل حادثه على الطريق وتقول لا اله الا الله استر يارب ..رابع فقره التحدى ...عباره عن مسابقه مين اكتر واحد ممكن يستنشق اكبر قدر من عوادم السيارات ..وخامس فقره هى الانكار ..عباره عن انكار وجود طعام يحتوى على لحوم او طيور فى الحياه ..واخر فقره وهى الصدمه ..عباره عن اكتشاف انك نسيت تجيب عيش وانت مروح :)))

انفصاااااااااااااااااااااال

انا حاسس انى ممكن يحصلى انفصال فى الشخصيه ..بليل فى وسط البلد بروح أكل ايس كريم واقول للراجل لو سمحت شوكلاته مع فانيليا والراجل يرد حاضر حضرتك ...فى الصبح فى العاشر من رمضان بروح اقف على عربيه فول واقول للراجل معاك شقتيين طعميه على بطاطس والراجل يرد ..عاوز سلطه معاهم يا أستاذ ..ههههههههههههههههه :))

ممثل بارع 

وانا نازل من المينى باص ...واحد بيقول لصاحبه ..انا بكره رايح اصور فيلم مع ايتن عامر ..هنروح نجرى ونقول حريقه ..ههههههههههههههههههههههههههه

الذبابه الملعونه 

غمض عينيك وافتحها تانى ...هتلاقى اى حاجه فى حياتك ممكن تتغير الا الذبابه بنت تيتتتتت مش عاوز تسيب صوابع رجلك ..مش عارف ليه هى فكرها صوابع زينب :))

هواكب التغيرات 

انا حلقت شعرى فى صفط اللبن والراجل حلقلى حلقه سواقيين زى ما الكتاب بيقول ..ومن هذا المنطلق الخطير والغير محسوب سوف أغير اسمى من محمود الى حناطه وذلك لمجاراه الاحداث المتتاليه ...والتأقلم مع الواقع :))

الكتاتنى والبى ام

فى فيديو نزل للكتاتنى وهو راكب البى ام ..مع احترامى الشديد للدكتور الكتاتنى بس هو شايف الناس مش لاقيه امبوبه وهو راكب عربيه زى  دى ..واحد من الاخوان قال دى عربيه تبع المجلس ومحدش ينشر اشاعات ..انا عارف ان دى مش عربيه الكتاتنى  بس لازم مراعاه شعور الشعب الى مش لاقى حق العيش ..عربيه زى دى ممكن تتباع وتأكل قرى مش قريه واحده  او رفع مرتبات عمال البوتجاز الى مضروبيين عن الانتاج فى سوهاج ...الناس انتخبت الاخوان عشان عيشين معاهم وبيمشوا معاهم فى الشوراع الى مش مرصوفه ...سيبك من الناس ..فين مبادئ الاخوان و كتبهم فى العداله الاجتماعيه فى الاسلام من حسن البنا وسيد قطب ...يا خوفى لنبدأ نعمل حزب وطنى جديد والبدايه تبقى عربيه بى ام 

مسرح الشعب

بص يا سيدى النهارده فى مجلس الشعب الجلسه بدأت والحكومه جات بس الجنزورى كان بيلعب تمارين الركوع فمقدرش يجى ..نيجى بقا للوزراء ..وزير العدل طالع يقول استقلال القضاء وانا مقدرش اعمل حاجه وعاوز اجرى بسرعه على الكرسى بتاعى عشان وزير الطيران عاوز يقعد عليه وبعد كده جات وزيره الازياء الدوليه بصراحه تحسها وهى رايحه المجلس مش بتفكر فى الاسئله الى ممكن  تتسئلها اكتر من انها هتلبس ايه النهارده بس بصراحه زوقها حلو راحت تقول كلمتها وكلها ثقه ان محدش هيقدر يقعد على الكرسى بتعها ...دولى بقى ..وطلعت تقول انا مش هينفع اجى بكره عشان مش كاويا الطقم الجديد ..نروح بقى لوزير الطيران المبتسم ..راح يقول لقد وقعنا فى الفخ والطياره كانت مركبه خط  66 التبه مدينه نصر بس طلعت 18 امريكا ..ومتخافوش سحبنا الرخص واخيرا وزيره التأمينات ودى مرضتش تسيب الكرسى اصلا ...وطبعا نواب المجلس ميهنونش عليهم تخلص المسرحيه من غير ما يقروا الائحه ياريس  والريس يقوا لا تقاطع سيب الناس تضحك ..ده الى انا فهمتوا النهارده :))

سوهاج ؟؟؟؟؟

عايش فى  محاقظه سوهاج الى  هى من افقر محافظات مصر ..حيث مصر من افقر دول افرقيا وبلتالى افرقيا من افقر قارات كوكب الارض ومش بعيده كوكب الارض يكون افقر كوكب قى المجره ..لو انت بقى قاعد فى وش المجره اعمل زووووم جامد لغايه ما توصل لافقر مواطن فى سوهاج بس للاسف مش هتشوف وشه عشان شايل الانبوبه وراسه لتحت ..اه الكأبه دى ..بس احب افرحك واقولك ان سوهاج فيها اتنين كورنيش على نيل واحد ..وده الى حير كتير من العلماء والشرطه النهريه :))

نظره فلسفيه

نظره فلسفيه :)) انا شايف ان النوم ده هو قمه النشاط واختصار الوقت ..يعنى مثال.. مش اخدنا ان اقرب مسافه لاى نقطتتين هو الخط المستقيم ..نفس الموضوع انا ورايا حاجه وفاضل عليها 8 ساعات مش اقرب حاجه عشان توصلها انك تنام وتصحى تلاقى الميعاد جه ..صح ..ههههههههههههههههههههههههههههه :))

اول مره

هى دى اول مره ...مره ....مره....ليه متكنش كلمه مره دى فرصه ويبقى الناس اول ما تشوف كلمه فرصه تعتبرها مره ...ممكن يعنى مثلا نقول....... فرصه واحد صحبى ...اول فرصه تحب يا قلبى ...ويبقى كده اول فرصه نغير معنى كلمه فى نظر الناس ...:))